www.mottyilowitz.com ©Motty Ilowitz 2025
איסור השגת התוכן ללא אישור המחבר
איך זיץ אינמיטן פעלד געווענטליך – דארטן קענט איר מיר זען
איך בין צאמגעשטעלט פון אפאר בענקלעך – אמאל פינף, אמאל צען.
איך זיץ אויף די גרינע גראז – אויסגעשטעלט אין א רינגל
איך שטעק איבעראל אריין די נאז – און איך האב גאר א לויזן צינגל.
פאר מיר דערציילט מען אלעס – יא, אלעס פון יעדן איך ווייס
יעדנ’ס חסרונות און יעדנ’ס מעלות – ווילט איר אוודאי וויסן וויאזוי איך הייס?
איך הייס, די סירקל! 🪑🪑🪑
(www.mottyilowitz.com)
֍֍֍
ביי מיר זיצן מענטשן – וואס רעדן זייער אסאך
אוי גאט זאל זיי בענטשן –זיי קייען יעדן טאג איבער די זעלבע זאך.
דער רעדט זיך אפ – און דער טוט זיך אויף
איינער האט די נאז אראפ – און איינער די קאפ ארויף.
א מינוט מ’לאכט – א מינוט מ’וויינט
דער זאגט וואס מ’טראכט – און דער דער זאגט וואס מ’מיינט.
ביי מיר רעדן מען פון המן־טאשן אום פורים — פון די האלאפטשעס פון הושענא רבה
פון די קליינע בעיבי’ס יסורים – ביז די סגולות פון די עלטער באבע.
ביי מיר זענען דא ויכוחים – אזש דאס האלדז קומט ארויס
און ביי מיר שטעלט מען צאם שידוכים – וואס לאזן זיך קיינמאל נישט אויס!
ווילט איר אוודאי וויסן וויאזוי איך הייס?
איך הייס, די סירקל! 🪑🪑🪑
(www.mottyilowitz.com)
֍֍֍
ביי מיר פארציילט מען די דראמא – וואס טוט זיך אונטערן טיר
פון די שוויגער, פון די מאמע – פונעם טאכטער און פונעם שניר.
מען רעדט פון יעדן סעיל – וואקאציע אדער א טריפ
פון צוקער און פון מעל – פון קאמפאט און פון זופ.
מ’רעדט פון סקול און פון חדר – פון ‘whatever’ און ‘you know’
מ’רעדט פון שיך און מ’רעדט פון קליידער – און רעסעפּי’ס פון sour dough.
דער שטריקט די סוועטער אירע – א צווייטער וואשט זיך אויף קמח ישן
דער זאגט פרק שירה – און דער הערט ביי מיר קול הלשון.
דער רעדט פון בטחון – און לערנט פאר א שטיקל חפץ חיים
און נאכדעם בארעדט מען דעם שכן – אזש ס’איז ממש שומו שמים.
ווילט איר אוודאי וויסן וויאזוי איך הייס?
איך הייס, די סירקל! 🪑🪑🪑
(www.mottyilowitz.com)
֍֍֍
איך הער ווער ס’איז חתונה געהאט – און איך ווייס ווער ס’איז ג’גט
ווער ס’איז געשטארבן אדער כמעט – און איך ווייס פונקטליך זייער חטא.
איך ווייס אלעס איבער דייעטס – און איבער רעטורנס פון עמעזאן
וואס איך הער מיך צאם במשך דעם זמן הקיץ – גלייבטס מיר, איז בכלל נישט קיין פאן.
יעדער אויף איינמאל ברומט – אבער איין זאך פארשטיין איך וויל
אלס איז דא איינער וואס ווען יענער קומט – בלייבט א יעדער שטיל.
אויך איז דא עפעס וואס איך קען נישט גלייבן – אסאך מאל איז מען שעות דא באזעצט
און יעדער האט מורא זיך אויפצוהייבן – ווייל יעדער גייט רעדן פון מיר יעצט…!
עס ווערט שוין נאכט, איר זאלט אבער נישט זארגן – די שניצל ברענט צו, און פארמאכט איז שוין די pool
איך וועל אייך אי”ה זעהן מארגן – און מ’וועט איבערקייען אלעס פון היינט.. נאכאמאל!
אפשר וועגן דעם הייס איך: די ‘סירקל‘?!?! 🪑🪑🪑🪑🪑
www.mottyilowitz.com ©Motty Ilowitz 2025
איסור השגת התוכן ללא אישור המחבר
֍֍֍
One Response
די בענקלעך מיינע האלטן – פאר יארן יארן לאנג
טראץ עס האט שוין פיל שפאלטן – עס קרעכצט מיט דראנג
קויפן א נייע איז אפשר מעגליך – דאך עס לוינט נישט
דאס בענקל מיינע טעגליך – זכרונות מיר אויף פרישט